Malper > Nue > SEBA RAYAPÊROYÎ YA KURDISTANÎ Û TIRKÎYA

SEBA RAYAPÊROYÎ YA KURDISTANÎ Û TIRKÎYA


SEBA RAYAPÊROYÎ YA KURDISTANÎ Û TIRKÎYA

 

Bi nameyê Homayê rehman û rehîmî

 

Ewladê Kerbela yîme, bêgune yîme; ayv o, zulm o, cînayet o.

Mi bese nêkerd zur û hîleyanê sima de baş bikerî, no mi rê bî derd. La mi kî vera sima de çok nêda erd, wa no kî sima rê bibo derd!

Şehîd Seyîd Riza

 

Zulm û qetlîamê ke dewleta tirkan û rejîmê înanê kemalîstî seserra peyêne de Kurdistan de ma kurdan ser o tetbîq kerdo ra yew zî Terteleyê Dêrsimî yê 1937-38î yo.

 

Terteleyê Dêrsimî jenosîdêko winasî yo ke bi hawayêko plankerde ‘goreyê mewzuatî ra’ bi destê dewlete îcra bîyo. Dewleta Tirkîya, sere de Mistefa Kemal heme kadroyê dewlete yê ê wextî û partîya îqtîdarî CHP bi hawayêko sazgeyî nê jenosîdî ra mesûl ê.

 

Seyîd Rizayo şehîd û embazê eyê doza neteweyî yê ezîzî, tena waştêne ke welatê xo de goreyê heqanê xo yê tebîîyan bi hawayêko xodmuxtar îtîqad û kulturê xo ser o cuya xo dewam bikerê. La rejîmê kemalîst-faşîst yê tekperest û înkarkerî bi metodanê teberê însanîyetî de êrîşê înan kerd û netîcede mintiqaya Dêrsimî de jenosîd tetbîq kerd, şarê ucayî talan kerd û serê hardê xo ra kerdî ra, milet heme qir kerd.

 

Seyîd Rizayo şehîd Kurdistan de lîderêko gird yê şarî bi. Ey û embazanê xo waştêne ke mintiqaya Dêrsimî ya Kurdistanî de kulturê xo biseveknê. Gama ke huqûqê înan ame pelixnayîş, êrîş û qetlîamî reyde rî bi rî bî, mecbur mendî ke xo ver bidê. Coka xoverdayîşê înan hetê însanî û îslamî ra meşrû yo. La êrîş û qetlîamê dewleta tirkan û rejîmê kemalîstî xeyrî meşrû û çarçewaya sûcê vera însanîyetî de yo.

 

Ewro partîyê sey CHP, MHP û kesê kemalîstê yê bînî ke îdîa kenê vanê Komara Tirkîya heqdar a û wayîrîya jenosîdî kenê, no yeno a mana ke xo kenê şirîkê sucanê vera însanîyetî de. Ganî dewlete Terteleyê Dêrsimî bi hawayêko resmî Meclisê xo de qebûl bikero, uzir biwazo û hetê madî û manewî ra qanûnen zerar û zîyanî tezmîn bikero.

 

Dêrsimî û Kurdistanê Vakurî ser o serwerîya zordare ya sîyasî, eskerî û îdeolojîke ya Komara Tirkîya xeyrî meşrû ya. Ganî Dêrsim Kurdistanî ra girêdaye mintiqayêka xodmuxtare bo. Şarê Kurdistanî ney ra teber tu alternatîfêk do qebûl nêkero. Amacê dewleta tirkan no yo ke zengînîya îtîqadî, lehçeyî û kulturî ya şarê Kurdistanî suîstîmal bikero û îtîfaqê şarê Kurdistanî bixeripno. Labelê Dêrsim û Seyîd Rizayo şehîd rûmetê neteweyî, birîna milî û tarîxî yê ma şarê Kurdistanî yo.

 

Senî ke ma îzin nêdanê ke hukmatê AKP çarçewaya munaqeşeyanê rojaneyan de seke wayîrîya Dêrsimî bikero xo nîşan bido û bi uzrwaştişêkê lingan ser o na mesela vîndî bikero, eynî wina, ma îzin nêdanê hêzê faşîst, înkarker û kemalîstî yê sey CHP û MHP ke vera xatiraya ezîze ya Seyîd Rizayê şehîdî de bêhurmetîye bikerê û ma înan şermezar kenê. Bêhurmetîya vera Seyîd Rizayê şehîdî de bêhurmetîya vera şarê Kurdisanî de ya. Nê ocaxê faşîstî esla do bese nêkerê ke erjanê ma qirêj bikerê.

 

Serrgêra 77. ya Terteleyê Dêrsimî û îdamkerdişê Seyîd Rizayê şehîdî û embazanê ey de, ma Seyîd Rizayê şehîdî û embazanê ey bi şukran û minet anê xo vîr û vanê “Rayîrê şima rayîrê ma yo.”

 

Heq şehadetê înan qebûl bikero. Amîn…

 

Biciwîyo Kurdistano Azad!

 

Seba Heq Edalet û Azadî Hereketê Îslamî yê Kurdistanî / Hereketê AZADΠ