Malper > alak > Ma şehîdanê Şarê Kurdî “Şêx Seîd û embazanê ey” xo vîr ra nêkenê

Ma şehîdanê Şarê Kurdî “Şêx Seîd û embazanê ey” xo vîr ra nêkenê

 

Ma şehîdanê Şarê Kurdî “Şêx Seîd û embazanê ey” xo vîr ra nêkenê

 

Destpêkê seserra verêne de dema ke dinyayêka newa ameye awankerdiş; şarê kurd, rastê xiyanetê hêzanê pîlan û Kemalîstan ame.

 

Serranê 1920an de kurdan rê peyamê biratî erşawîyayê û goya dewlata newa hetê kurdan û tirkan ra pîya awan bîyêne.

 

Labelê, wexto ke serra 1923 de Komara Tirkiya ronîyaye û dima zî bi Peymanê Lozanî bi hawayo mîyanneteweyî şinasîyaye, ne birayî mende û ne zî qewl û sozê ke ameybî dayîş.

 

Gama yewine ya kemalîstan; înkarkerdişê bîyayîşê neteweyê kurdan û orte ra wedartişê rastîya Kurdistanî bî.

 

Kurdan zî bi awayêko tabiî vera na neheqîya tarîxî û polîtîkaya înkarkerdiş û kolonyalîstî îtîraz kerd.

 

Kurdan, seba ke welatê xo Kurdistan de bi hawayêko azad û sereberz bicuyî, vengê xo berz kerd.

 

Dewleta tirkan, vera nê waştişanê însanîyan û meşrûyanê şarê kurdî, bi usulanê tewr wehşîyane cewab da û seba fetisnayişê îradeyê kurdan yê azadîwazî têgeyraye.

 

Dîyarbekir de “Mehkemeyê Îstîklalî” ronîyayî ke tu hetê xo yê huqûqî çin bî.

 

Serek û rayberê erjaye yê şarê kurdî Şêx Seîd û 47 embazê xo 91 serrî verî na roje, hetê na mehkemaya korsanî ra bi awayêko bêhuqûqî û bi binpayankerdişê heme qaîdeyanê huqûqê mîyanneteweyî, taxa Berê Koyî yê Dîyarbekirî de ameyî dardekerdiş.

 

Eslê xo de bi dardekerdişê înan, waşt ke îradeyê şarê kurdî bifetisnê. Na yewe de waştişê şarê kurdî yê cuya azad û sereberz amebi dardekerdiş.

 

Dewlete, qîma xo bi naye zî neard û bi seyan dewe û qezayanê kurdan wêran kerd. Bi hezaran kurdê sivîl û bêgunayî; cinî, kal û gedeyî bi hawayêko xeyrê însanî ameyê qetilkerdiş. Ê ke mendî zî, bi sehezaran bi zor ca û waranê xo ra nefî bîy.

 

Dewleta dagirkere ya tirke, hende waştişê kurdan ra tersaybî ke qebranê serekanê înan zî, înan ra nimitbi. Dewlete, bi nimitişê mezelê Şêx Seîd û embazanê înan, edetanê hezarserran yê şaranê herême û yê dînê îslamî binpayan kerd.

 

No usulê xo yo hov û xeyrê însanî, serranê bînan de zî domna. Mezelê rayberê serewedartişê Dêrsimî Seyîd Rîzayî û Seîdê Kurdî zî, bi nê usulan ame çinêkerdiş.

 

Çunkî, dewlete waştêne ke bi nimitiş û çinkerdişê mezelanê serek û rayberanê kurdan, kurdan vîrê înan yê millî ra bêbar verdo û înan kokê xo ra dûr biko. Bi vindîkerdişê goranê rayberanê kurdan, waştêne ke kurdî, hişmendîya neteweyî ra dûr bikewî.

 

Yew hesabê dewleta dagirkere zî no bi; wexto ke kokê dare bêro birnayîş, do şax û gilê aye zî xo vero wişk bibê. Wexto ke tarîxê neteweyêk zî bêro çinkerdiş, îmkanê viraştişê pêşerojê aye zî, dest ra şino. Bi nê hawayî do bieşkê hetanî û hetanî kurdan mehkûmê zincîrê koletî bikê.

 

Dewleta tirke, seranserê seserra verêne de, semedê çinkerdişê doza azadîya neteweyî ya kurdan, rayîr û ûsul nêverda ke ceribna.

 

Verba nê zilm û zordariya dagirkeran, şarê kurdî zî her çar parçeyê Kurdistanî de mucadeleyê azadî bêvindertiş domna.

 

Hinî îspat bîyo ke bi rayîran û ûsulanê leşkerî; bi siyasetê red û înkarkerdiş, bi kiştiş û qetilkerdiş, bi wêrankerdiş û nefîkerdiş ke no se serrî yo dewletê dagirkerî şopnenê, meseleya kurdan nîna çareserkerdiş. Bi eynî siyaset û ûsulî, ewro zî nêeşkenê serbikewî.

 

Gereka dewleta tirke, heme heqanê kurdan ke netewebîyayîşê înan ra yeno, bişinasno.

 

Ganî dewlete cayê mezelanê Şêx Seîd û hevalanê ey, Seyîd Riza û Seîdê Kurdî ke no neway serrî yo nimito, eşkera biko.

 

Gereka îdarekarê dewleta tirke, seba nê siyasetê xo yê zilumkarî ke verba kurdan ramito, şarê kurdî ra bi hawayo resmî uzrê xo biwazo.

 

Ma sey partî û tewgerê Kurdistanî;
Ma qet eslê xo ra dûr nêkewenî û tarîxê şarê xo, xo vîr ra nêkenê,
Ma soz danê şarê xo, ma do bixebitîyê ke no tarîxê ma yo ke ameyo serûbinkerdiş, bi hawayêko roşn û rastikên cayê xo bigîro,
Ma destûr nêdanê derheqê tarîxê ma yê neteweyî de teşebusanê siyakerdiş û zûran rê,
Ma şehîdanê 1925î, cuya xo de, hetanî hetan xo vîr ra nêkenê.

 

Biciwîyo qehremanê şarê kurdî Şêx Seîd û embazê ey,
Biciwîyo mucadeleyê azadîyê miletê kurdî!

 

29 Hezirane 2016 Dîyarbekir

 

AZADÎ, PAK, PAKURD, PDK-BAKUR, PSK